Z Budyšyna/Bautzen. We slědnem wudaśu Nowego Casnika smy Was informěrowali wó zarědowanju Domowiny, na kótaremž su pócesćili zasłužbnych a dłujkolětnych cłonkow z Mytom Domowiny a Cesnym znamuškom. Tenraz pśedstajijomy w krotkich portrejach Domowinarje z Dolneje Łužyce, kenž su pśed dwěma tyźenjoma dostali Myta.

Waltraud Ramotowa z Wětošowa jo dostała Myto Domowiny. Wóna jo wjele lět w župnem pśedsedaŕstwje župy Dolna Łužyca sobu źěłała a cesnoamtsku funkciju zagroniteje za serbske nastupnosći w měsće Wětošow a pózdźej we wokrejsu Górne Błota-Łužyca wugbała.

Z Cesnym Znamuškom su pócesćili Güntera Pawliša z Lubochowa, kenž jo se mjazy drugim wó to starał, až Zły Komorow ma zasej Domowinsku kupku. Renata Pawlowa póchada z rodneje jsy Fryca Rochy, ze Šejnejdy, a jo na to glědała, aby njezabyli mě togo ceptarja, basnikarja a kantora. André Wenzke z Groźišća jo dłujkolětny zastojaŕ małeje jsy a jo z lěta 2016 zastupny pśedsedaŕ nowozałožoneje Domowinskeje kupki.

Redakcija Nowego Casnika