Z Janšojc/Jänschwalde. We septemberje stej Krabatowa šula w Janšojcach a Dolnoserbska kulturna akademija pódpisałej kooperaciske dogrono. Wóno wopśimjejo regulu, až Dolnoserbska akademija buźo raz wob tyźeń (gdyž njejsu žedne ferije) pśewjasć rejowański trening, raz wob tyźeń chorowy trening a jaden raz we šulskem lěśe projektowy tyźeń. Šula dej za to śpy abo športowu halu měś lichu. Lětosa jo ten projektowy tyźeń južo był, ga we septemberje. Kužda rědownja jo pśez to mógała se raz wobźěliś. Snaź buźo hyšći dalšny projektowy tyźeń we běžecem šulskem lěśe. To dogrono běžy nejpjerwjej až do kóńca lěta 2023. Tak dłujko ma Dolnoserbska kulturna akademija (DKA) za to cełe financielny zakład. Cil jo, až to dogrono dej se pón pódlejšyś, to pak wótwisujo wót pśidatnych pjenjez. Principielnje stoj we kooperaciskem dogronje, až DKA dej serbske projekty abo projekty ze serbskeju orientaciju pśigótowaś we šuli. Take dogrono ma DKA teke z drugimi šulami. Ze źiśownjami, źož jadnotliwe źiwadłowe projekty su, ma DKA druge dogrona.