Ze Žemrja/Žemŕ (Lubsko/Sommerfeld). Južo wěsty cas su se serbske familije žycyli dlejše zmakanje nježli jano jadno wótpołdnjo a teke, až zmakanja njejsu we nimskej wokolinje. Sobotu 8. oktobra jo było tak daloko. Rěcny centrum Witaj (RCW) jo pśepšosył na cełodnjowske drogowanje do Pólskeje, ale weto do blisko granice połožonego wuceńskego centruma Jeziory Wysokie, což jo na serbski Wusoke jazory blisko Lubska. Dospołne pólske mě jo: Ośrodek Edukacji Przyrodniczo-Leśnej w Jeziorach Wysokich (Pśirodowo-lěsny kubłański centrum we Wusokich Jazorach). A wulět tam jo se wjelgin wupłaśił, dokulaž jo to napšawdu wjelgin rědny a za woglědarjow, wósebnje za źiśi, didaktiski zajmnje wugótowany centrum za póznaśe a rozměśe góle. Smy měli skazane wjeźenje pśez ceły areal, ako jo pó wjelgin wěcywuznatej wašni gótował tam pśistajony Paweł Mrowiński. Do dolnoserbšćiny jo pólsku rěc kompetentnje pśestajił nan serbski powědajucych źiśi a sam Pólak Grzegorz Wieczorek.