Z Picnja/Peitz. Jano někotare dny pśi swójim 90. narodnym dnjom a pśed diamantneju swajźbu jo wumrěł 5. oktobrje w Picnju Serb, ako jo we swójom casu sobu pisał wuwiśe a źěło Domowiny w Dolnej Łužycy. Jo to Hinc Bóseńc, kenž jo w casu DDR wjele lět źěłał ako instruktor w Domowinskej župje Chóśebuz. Kuždy źeń jo był z mopedom ducy, aby był Domowinskim kupkam a jich pśedsedaŕstwam k pomocy w jich źěle ze cłonkami. Pśi tom jo teke z wuspěchom wabił za cytanje Casnika, Pratyje a dalšnych serbskich knigłow a za woglěd serbskich kulturnych zarědowanjow. Źěłał jo teke dlejšy cas ako rybaŕ w znatem Picańskem rybaŕstwje a wjele, wjele lět jo był cłonk Zjadnośeństwa serbskich błośańskich rybarjow Bórkowy a wokolina. Jo pśisłušał rybaŕskej kupce we Drjenowje.