Z Chóśebuza/Cottbus. Dnja 26. septembera jo se rědownja 9C Dolnoserbskego gymnaziuma wobźěliła na Nimsko-pólskem festiwalu młoźiny w Zelenej Górje (Zielona Góra) w Domje Harcerza. Dogromady 70 wobźělnikow a wobźělnicow jo było pódla pśi projekśe, za kótaryž jo wabiła Joanna Sikorska wót Nimsko-pólskego towaristwa Chóśebuz za mjazynarodne młoźinske źěło. Z Nimskeje jo se 35 wukniki a wuknikow, teke někotare wót drugich šulow wobźěliło, na pśikład z wušeje šule Paul Werner, Steenbeck–gymnaziuma abo wót sportoweje šule. Festiwal jo se wugótował, financěrował a pódpěrował pśez kontaktowe městno „partnaŕstwo Chóśebuz-Zielona Góra“ a Europejskeje unije – Europejskego fondsa za regionalne wuwijanje.

Zajtša zeger wósymych smy se z busom na drogu do Zeleneje Góry wudali. Ja, ceptaŕka na Dolnoserbskem gymnaziumje, kótaraž wumějo teke pólsku rěc, jadna maś a jaden nan smy „źěłali“ ako pśewóźowarje, mediatory a teke dolmetšarje.