Z Barlinja/Berlin. Na lětosnem FUEN-kongresu w Barlinju su se delegaty zgromaźili, aby nowy prezidium a prezidenta europskego mjeńšynowego gremiuma wuzwólili. Prezident Loránt Vincze, kótaryž słuša k hungorskej mjeńšynje w Rumuńskej, jo zasej prezident, ale w prezidiumje njejsu Słowjany wěcej zastupjone. Zgromaźina delegatow jo sobotu, 1. oktobra, głownu rezoluciju k wójnje w Ukrainje wobzamknuła, w kótarejž jo zasuźiła rusojsku wójnu a wójnske njestatki. Wušej togo su źewjeś dalšnych rezolucijow wózjawili, mjazy drugim pśeśiwo wobgranicowanjeju maminorěcneje wucby a diskriminaciji nimskeje mjeńšyny w Pólskej.

Pśiducy kongres europskich narodnych mjeńšynow a rěcnych kupkow 2023 buźo wugótowany wót nimskeje mjeńšyny w Hungorskej w měsće Pécs/Fünfkirchen. Dalšna tema zmakanja jo była Europeada. Za zarědowanje balokopaŕskego turněra 2024 su se zjadnośili Dany w Nimskej, Frizy, nimske Sinti a Roma a Nimce w Dańskej, aby wugótowali Europeadu w nimsko-dańskem granicowem regionje.