Z Pódstupima/Potsdam. Co ma bramborske głowne město Pódstupim cyniś z tym serbskim a ze słowjańskim? To su kśěli raz wěźeś cłonki z Domowinskeju kupkowu Chóśebuz a Žylow, a togodla su se slědnu sobotu wudali na zgromadny wulět do togo města.
Měto Nowak, cłonk měsćańskeje kupki a serbski referent w bramborskem kulturnem ministaŕstwje, jo gósći z Łužyce wjadł pó měsće, a to głownje k tym městnam, ako maju něco cyniś ze słowjańskimi a serbskimi kórjenjami Pódstupima. To se wě, až jo pśi tom pokazał nowy dom bramborskego parlamenta a „swójo“ bramborske kulturne ministaŕstwo (we wobyma domoma ga se sobu rozsuźijo, kak Bramborska serbsku rěc a kulturu spěchujo). Ale głownje jo jomu wó to šło, pokazaś te městna a źěle města, źož su w dalokej a bliskej historiji grali Słowjany a teke Serby wažnu rolu.