Z Budyšyna/Bautzen. Mjenja pócesćonych z Mytom Domowiny ako teke z Cesnym znamuškom Domowiny jo mytowański wuběrk Zwězkowego pśedsedaŕstwa Domowiny w zachadnych lětach pśecej ned pó swójich rozsudach wózjawił. Lětosa jo zjawnosć to akle krotko do mytowańskego zarědowanja zgóniła, kótarež jo se wótměło zachadny pětk w budyšyńskem Serbskem domje. Z Mytom Domowiny za dorost lětosa njejo se nichten pócesćił.
Wuznamjenjenje jo wugrono źěka za wjelelětny wósobinski angažement w narodnem źěle. A to móžo wjelebocne byś, ako su wobźělniki cesnego zarědowanja w zalu Serbskego doma zgónili. „Cesnoamtske statkowanje z wšoserbskim wuznamom“ jo lawreatam Myta Domowiny jeje pśedsedaŕ Dawid Statnik wobkšuśił.