Na 17. septemberu jo 65. „Steubenparade“ w New York była. Z lěta 1957 śěgnjo kužde lěto tradicionalny pśeśěg pó Fifth Avenue. Z „Steubenparade“ se cesći nimska kultura a wuspěchy nimskich migrantow, jaden pśikład za to jo general Friedrich Wilhelm von Steuben. Toś ten pšuski general jo pomagał generaloju Georg Washington pśi zawjeźenju pšuskich, militarnych taktikow, což jo sobu wjadło k dobyśu pśeśiwo britiskej kronje a tak su koloniju wulichowali a USA su nastali ako lichy stat. Toś ta „Steubenparade“ njejo militarne zarědowanje, to jo pódobnje pśeśěgoju drastwow. Wšake kupki z Nimskeje su se wobźělili, muzikowe towaristwa, drastwowe kupki, karnewalowe organizacije a towaristwa stśělcow. Wjele lět jo było śěžyšćo parady bayerska kultura. Mjaztym su teke how změny wiźeś w slědnych lětach. Něnto se prezentěruju wšake kupki ze wšych regionow Nimskeje. Dla góźby 50. jubileja janšojskich dujaŕskich gercow su wóni dostali pśepšosenje za paradu. Gerce su pśewóźowali póry z Janšojc, se wě w lokalnej serbskej drastwje.