Z Noweje Niwy/Neu Zauche. Tudy, na pólu pśi Zakrjojskem puśu (Sacrower Weg), su se sobotu, 24. septembra, zmakali młodostne ze cełeje Dolneje Łužyce. Za nich jo to był 21. superkokot, a to k prědnemu razoju w Nowej Niwje, pótakem we jsy, źož kužde lěto wó kołac a nic wó głowu kokota rejtuju. 21 rejtarje, jich kralowki a wjele pśijaśelow ze 19 wejsnych młoźinow jo pśidrogowało pśi tej góźbje. Rejtarni „Jerol“ a „Wehlan“ z Rězakow stej stajałej wětšy źěl kónjow. W běgu dnja jo pśijěło pór hundert luźi do Noweje Niwy. Gósći su zaparkowali cełu wjas, lěcrownož su w Nowej Niwje ekstra pśigótowali tśi wjelike parkowanišća za ten event. Taki wjeliki ruś zwisujo zawěsće teke z tym, až dwě lěśe dłujko – pandemije dla – njejsu mógali wugótowaś superkokot.