Ze Slěpego/Schleife. Srjodu, 7. septembra, jo zachopiła tura Serbsko-Waliziskego pśijaśelstwa (SWP) w Slěpem. Wótpołdnja su se muzikarje SWP wobźělili na protestowem zmakanju wobswětnikow w slěpjańskej góli. Mjazy drugim su tam, na gruntach chóśebuskeje „Wobswětoweje kupki“, zazněli spiwy Paula Geigerzählera.

Za tym až jo se SWP tak (pó wašni „unplugged“) pśedstajiło, su se muzikarje pśigótowali na wjacorny wustup we jsy. Na farskem dwórje slěpjańskeje faraŕki Jadwigi Malinkoweje jo za to wokoło 50 zajmcow gromadu pśišło. We farskej brožni jo ten koncert był prědny wětšy kulturny event pó pandemiji. Mjazy gósćami su byli znate woblica ze cełeje serbskeje Łužyce, starše wobydlarje ze jsy, źiśi, wobswětowe aktiwisty a młodostne slěpjańskeje wósady. Aby wabili za turu, su cłonki teje młodeje wósady pilnje plakatěrowali a wob cas koncerta su měšali młogi njealkoholiski cocktail (na pśikład we tych stronach woblubowany \"Sorbische Sonne\") za gósći.