Z Łužyce/Lausitz. Prědna tura muzikowego projekta Serbsko-waliziskego pśijaśelstwa (SWP) jo se zglucyła zachopjeńk mjaseca. Wót 7. do 11. septembra su serbske a waliziske muzikarje turowali pó Łužycy, aby pśedstajili swój prědny zgromadny album „SERBSKO-WALIZISKE PŘEĆELSTWO / PŚIJAŚELSTWO*** CYFEILLGARWCH CYMRAEG A SORBIAN“. Na kaseśe a online pśez bandcamp wózjawjona produkcija jo źiwa žanrowa měšańca a zapśěgnjo techno, hip-hop, punk a folk w górnoserbskej, dolnoserbskej a waliziskej rěcy. Wustupili su młode wuměłce kuždy źeń w drugem lokalu: Srjodu w Slěpem, stwórtk na dwórje numer 8 w Kumšicach, pětk w klubje towaristwa \"Barakka\" w Nuknicach, sobotu w Chóśebuzu a njeźelu w barlinskem socialnem centrumje \"Kirche von Unten\".