Z Chóśebuza/Cottbus. Pětk, 9. septembra, jo wjednistwo Dolnoserbskego gymnaziuma (DSG) wugótowało swěźeń pśi góźbje 70. jubileja teje šule. Pśiducy źeń jo Załožba za serbski lud organizěrowała 38. Schadowanku DSG.
Hynac ako w pjerwjejšnych lětach pak, njejsu absolwenty swěśili w kafeteriji šule, ale na šulskem dwórje. Dla tog až jo město njeźelu wužywało chrom kafeterije ako wólbny lokal, jo załožba event tak pśekoncipěrowała.
Až jo to wjadło k wšakim śěžkosćam, wulicujo Simone Poetzschowa, sobuźěłaśeŕka załožby a głowna organizatorka togo dnja: „Smy lětosa musali wěcej planowaś za tu Schadowanku pód gołym njebjom. Pomocniki su na pśikład natwarili wjelike stany ako ,dešćowu alternatiwu‘, smy skazali toaletowy wózik za gósći a dla susednych wobydlarjow smy wobgranicowali program až do zeger 22:00.“