Ze Slěpego/Schleife. To serbske w tej małej slěpjańskej wósaźe ze wósymi jsami jo wjelgin pisane a bogate – ze swójeju wósebneju rěcu, z kšasneju ludoweju kulturu, ze swójeju dłujkeju historiju. Wjelika jo licba knigłow, kniglickow, brošurow a dalšnych publikacijow ze starych a nowych casow, w kótarychž jo toś ta bogatosć wopisana a pśedstajona. Za wětšy źěl su to žeńske a muske ze slěpjańskich stron sami wuslěźili a napisali.

Wót slědnego pónjeźelego maju tam dalšnu taku drogotnu a wjelgin zajmnu publikaciju. Z titelom „Schwarzweiß - carnoběłe“ ga su w slědnyma lětoma zestajili nowe knigły, w kótarychž jo to grono wó serbskich „swaŕbach“ (swajźbach) we jsach slěpjańskeje wósady w lětach 1902 do 1954. Na dogromady 107 historiskich fotach wiźi cytaŕ, kak su luźe how swěśili swajźbu ako serbski ludowy nałog. K tomu słušaju na tych dogromady 150 bokach wjelgin zajmne informacije a powěsći wó muzice a gercach, wó jězach a piśach na swajźbach, wó licbje swajźbow w tych prědnych 50 lětach 20. stolěśa a wó młogem drugem.