Slěpe/Schleife. 23 wuknikow wušeje wule w Slěpem jo tśi dny chójźiło pó jsach slěpjańskeje wósady. Wóni su dejali zapópadowaś wěcy, bildy, zuki, wóń a słowa a naslědku z togo nadejźonego materiala pšawe rozpokazowanje a dokumentaciju serb­skego žywjenja wugótowaś.

Wóny projekt „Pytarje wutšoby“ jo njasło spěchowańske towaristwo za muzej górnistwa (Bergbaumuseum) w Knappenrode, we zgromadnem źěle z tamneju energijoweju fabriku, z Domowinu a ze slěpjańskeju šulu. Wjednik šule Wolfgang Goldstein jo jen wjelgin chwalił: Zwjaselece jo było, až wejsanarje su se pśed źiśimi wótwórili a jim wjele wót swójich nazgónjenjow wulicyli.

Na stwórtem dnju projekta su natwarili we wjažy šule wustajeńcu, źož se pokazujo wjeliki pókład dopomnjeśow. Někotare witriny su hyšći prozne. „Dajo hyšći wjele kamuškow we žywjenju wobydarjow, kótarež ga su dla brunice nutśikach zrozrywane“, jo nam gronił Robert Lorenz, wjednik projekta. Wukniki źewjeteje klase su za jogo zdaśim derje pśemógli, za tśi dny pšawu „komorku źiwow“ zestajaś.