Z Rěčic/Rietschen. W rewěrowem konceptu LEAG z lěta 2017 jo wustajone, kak buźo to brunicowe górnistwo se wuwijaś we pśiducych lětźasetkach. Což nastupa plany za Rychwałdsku jamu, njejo tam wjele nowego namakaś. Wóna dej se dalej wjasć pśisamem we tej južo wótzaprědka planowanej dimensiji, ak jo wopisana we planje z lěta 1994. Jadna wěc pak jo weto nowa: LEAG wóstajijo na pokoj jaden małki kut ceło na dłujkem pódzajtšu (Nord-osten) jamy – a z tym buźo komandantura wójaŕskego eksercěrowanišća Górna Łužyca wobzwarnowana. Wót wšogo zachopjeńka jo było teke to pśepołoženje kólejow mjazy Bełeju Wódu a Rěčicami wustajone. Ceło we wobjadnosći ze zawinowaŕskim principom dej LEAG wšykne kosty za njo njasć. Plany togo pśesajźenja kólejow su wordowali w lěśe 2018 wót LEAG a Nimskeje zeleznice prědkpołožone. Pótrjefjone su wobydlarje wjaski Góla/Haide we wuskidźańskej gmejnje, ale teke wobsednikarje gruntow na dłujke pódzajtšo jsy Rěčicy.