Ze Žylowa/Sielow. Južo 14. raz jo wobydlaŕske towaristwo slědnu njeźelu pśepšosyło wejsanarjow na terasu žylojskego sportnišća k „Lěśojskej zagroźe“. Zarědowanjeju jo se něga „lěśojski swěźeń“ groniło. To jo wopśimjeło wěcej ako dwěgóźinski pyšny program. We tom programje su lajske wuměłce wustupili, ale su teke zajmne informacije z chóśebuskego měsćańskego źěla dalej dali. Profesor Leo Schmidt wót Bramborskeje techniskeje uniwersity jo wó fazy pśetwarjenja žylojskego młyna informěrował a Sven Bogacz jo na zachopjeńk a wuwiśe prědnego chóśebuskego sedlenje pó pśewrośe „Wohnpark“ dopomnjeł. Kupka „Styri dobre tšuny“ jo zasej muzikaliski pódla była a spiwaŕka Gitte Beyerowa jo rozwjaseliła ze znatymi spiwami. Nejwětšy aplaws su pak źiśi žylojskego Witaj-horta dostali, kótarež su se pśedobyli karaoke-wuběźowanje ku kóńcoju slědnego šulskego lěta. Wóni su se z tym „startowe pšawo“ zawěsćili, aby pśi programje „lěśojskeje zagrody“ wustupili.