Ze Žylowa/Sielow. Něgajšny chorowy wjednik a rogeński ceptaŕ Helmut Rotkähl, jo swěśił 19. awgusta w krejzu familije a pśijaśelow, ze źiśimi a enkelźiśimi swój 101. narodny źeń. Tak ako kužde lěto su jomu woglědali teke spiwaŕki a spiwarje Nimsko-serbskego Žylojskego chora na tom cesnem dnju a jomu muzikaliski gratulěrowali. Su zgłosyli štucki, kótarež su južo gromaźe ze swójim něgajšnym dirigentom spiwali, a jubilar jo teke tenraz pilnje sobu dirigěrował. W mjenju Chóśebuskego wušego šołty jo wjednica fachowego wobcerjenja Ines Loberowa wutšobnje gratulěrowała.

Helmut Rotkähl jo se we tych wjelesych lětach swójogo aktiwnego chorowego źěła wósebnje procował wó dolnoserbsku chorowu muziku. Wón jo 36 lět –a to wót lěta 1961 až do 1997 – nawjedował Žylojski měšany nimsko-serbski chor. Pśed tym, ale teke w samskich lětach, jo nawjedował teke take chory regiona ako ten w Žylowku abo Dešanku. Za swójo wobšyrne muzikaliske źěło na serbskem polu jo se teke pócesćił z Mytom Domowiny.