Z Łužyce/Lausitz. „Cyfeill garwch cymraeg a sorbian – Serbsko-waliziske pśijaśelstwo“ groni se projektoju, z kótarymž jo pěsnjaŕ Paul Geigerzähler jury idejowego wuběźowanja Załožby za serbski lud „Rěc wjaza – Rěc zwězujo – Sorbisch verbindet“ mógał pśeznaniś. We wjelesych etapach jo se zwopšawźił, mjazy drugim z koncertom w Barlinskej „Rybowej loźe/Fischladen“ a z tyźeńskeju źěłaŕnju w Chóśebuzu, źož jo nagromadu 13 wuměłcow a kupkow z Łužyce a z Walesa 15 muzikowych kuskow z tekstami w tśich rěcach komponěrowało a nagrawało. Skóro deje se te wózjawiś na CD. Aby za to pšawje wabili a ideju pšawje pśedstajili, zachopijo se 9. septembra w Slěpem krotka turneja, na kótarejž kśě wuměłce swóju twóŕbu pšawje pśedstajiś. Až do 11. septembra slěduju stacije Kumšicy, Nuknica a Chóśebuz – how co se „serbsko-waliziske pśijaśelstwo“ wótpołdnja na schadowance a wjacor w „Bebelu“ prezentěrowaś - a pótom w Barlinju. To wósebne na tej turneji jo, až to na wšych městnach hynakše wuměłce pśedstajiju.