Ze Žylowa/Sielow. We WITAJ- horśe „Njewjericka“ su se něco rědnego wumyslili. Wót 8. – 12. awgusta jo how był WITAJ-tyźeń, kenž jo był połny ze serbskeju zaběru a serbskeju muziku. Srjodu jo pśedstajiła Madlena Norbergowa (Rěcny centrum WITAJ/RCW) nowe źiśece knigły „Findus a góńtwa za lišku“, ako jo pśestajiła do dolnoserbskeje rěcy. Stwórtk su se źiśi wupórali na Lědy do błośańskego muzeuma pód gołym njebjom. Tam su se woglědali, kak su Serby něga žywe byli. Pótom su póžywali błośańsku pśirodu. Pětk dopołdnja jo Katarzyna Fidekowa, nowa sobuźěłaśeŕka w RCW a nowa redaktorka źiśecego casopisa „Płomje“, wulicowała, co ako redaktorka gótujo a kak casopis nastanjo. Pón su źiśi we rolach cytali comic „Felix a Florian“. Paralelnje w drugej kupce jo Katrin Lehmannojc wót RCW w serbskej rěcy grała ze źiśimi towarišne graśa. Pomogała jo jej Maja Melcherojc, wóna jo prozninske źěło w RCW wugbała. Mały wjerašk a zakóńcenje tyźenja jo był pětk wótpołdnja serbska disko, źož su źiśi rejowali a spiwali serbske spiwy! Samo na drugich dnjach su w pśestawkach słyšaś byli serbske spiwy.