Ze Škódowa/Skadow. W lěśe 2011 jo był slědny raz, až w Škódowje su łapanje kokota wuswěśili. Njeźelu, 14. awgusta, jo aktiwna młoźina ze swójeju mócu nałog wóžywiła. „Maju młode woblica a su w slědnych lětach pó licbje narosli. Pódobnje ako jatšowny wogeń su kśěli teke łapanje kokota wuswěśiś. Dopomnjeśe na wejsny nałog jo hyšći było, lěcrownož źinsajšne młodostne su byli akle pěś abo šesć lět stare pśi slědnem razu“, jo gronił młoźinski šef Christian Kamenz. Gólcy su tyźenje dłujko se pśigótowali, wesrjejź julija su dostali góźiny na rejtowaŕskich dwórach. Pódpěru a dobru radu su krydnuli wót swójich nanow. Kak wjelika ta forta jo, nichten njejo wěcej wěźeł. Tak su starych luźi pšašali a pitśku su wó wjelikosći teke gódali. Južo srjodu su girlandu wili na swěśenišću a slědne pśigótowanja su se pśewjadli. Njeźelu jo rejtowało źewjeś rejtarjow a wósym marušow jo jich pógóniło. Głowu jo wóttergał młoźinski šef Christian Kamenzna kónu „Lucky“ wót rejtaŕskego dwóra Wehlan z Rězakow. Z wuspěchom Tobias Konzack wóttergał prědne kśidło.