Z Hochoze/Drachhausen. Pó dłujkem pśigótowanju, ako jo warnowało někotare tyźenje, su Hochozarje swój žnjowny swěźeń wuswěśili sobotu, 13. awgusta. „Južo wałtoru su swěźeńsku łuku wótsekli a natwaŕ forty planowali“, jo młoźinska šefina Iben Lotric groniła. Srjodu su gólcy šli pó dubowe gałuzki a źowća su na samskem dnju fortu doźěłali. Stwórtk źowća su wili sedym wěnkow. Tśi za kralow, tśi za kónjow. Sedymy wěnk jo za łaparja kokota, pó łapanju kokota młode muske maju kokota łapaś. Togo kokota jo Lorenz Krauße łapał. Kokota za fortu jo darił lětosa Sven Krüger. Sedym rejtarjow a 16 źowćow w serbskej drastwje, pěś wót nich jo było prědny raz pódla, wše su maršěrowali wót cerkwje na swěźeńsku łuku . Pódla jo rejowaŕska kupka z Hochoze była. Wóni su starali na swěźenišću pśidatnje k łapanjeju kokota za dobru a lawnu. Gólcy su doskok rejtowali a pó dwěma góźinoma su nowe krale dobyli. Prědny kokotowy kral jo Tom Kuchling z kónjom „Chef“ wót Manje Lobeźic wordował. Prědny kral jo wuzwólił Anna-Lina Kulišojc ako swóju kralowku.