Z Janšojc/Jänschwalde. „Herzlich Willkommen, Witajśo k nam“, z tymi słowami jo towaristwo „MY za Janšojce/WIR für Jänschwalde“ dnja 21. awgusta swóje něźi 3.000 gósći zbliska a zdaloka pśiwitało, ale pśed tym jo 13 cłonkow wěcej ako jadno lěto wugbało kšute pśigótowańske źěło. Janšojce póbitujo ze swójeju rědneju najsu nabejne městno z optimalnymi wuměnjenjami za taki wjeliki swěźeń. Pśedsedaŕ towaristwa Reik Miatke jo gronił: „Ja se wjaselim, až jo ze zapózdźenim lěta skóńcnje klapowało. Slědnej dwě lěśe njejstej lažkej byłej. We tej mysli teke źěk našomu janšojskemu gójcoju dr. Carstenoju Holzschuhoju. Mamy naźeju a dowěru, a tak cu se wuźěkowaś pla wšyknych, kenž su se wó to starali, až móžomy źinsa swěśiś.“ Pśepšosyli su Janšojske teke ministaŕskego prezidenta Dietmar Woidke, krajnego raźca (landrota) Haralda Altekrügera a zastupnu amtsku direktorku Kerstin Lichtblauowa, a wóni su pśišli. Ze swójima póstrownyma słowoma stej ministaŕ a krajny raźc chwaliłej, až pó dlejšej abstinency taka rědnosć zasej móžno jo a tak wjele woglědarjow pśišło jo.