Ze Žar/ Sorau. Wałtoru, 9. awgusta, jo zajtšo stojało wjele luźi pśed Šulu za dolnoserbsku rěc a kulturu („Rěcna šula“). Pśisamem 40 wósobow jo cakało, aby mógało do busowu zastupiś, kótarejž stej južo pśijěłej z Pólskeje. Cil wulěta jo głowne město pólskeje Łužyce „Žary“ (nimski Sorau, pólski Žary). Pó góźinje trajucem jězdźe jo pśijěła kupka na městno zarědowanja. Tam su cakali sobuorganizatory a sobuorganizatorki projekta. Wóni su zgromadnje z Edytu Rätzeloweju, docentku Šule za dolnoserbsku rěc a kulturu, projektowy źeń planowali. Teke dalšne wobźělniki z pólskego boka su pódla byli a dogromady jo se něźi 100 wósobow w Žarach zmakało w „Forwarku“ tamnego groda.