Z Města/Cottbus. Wjeliki zajm za druge seśowe zmakanje rěcnego projekta ZORJA jo se pokazał 1. awgusta. Wušej 30 zajmcow jo se w klubowni Serbskego doma a digitalnje zmakało, aby zgóniło aktualny staw projekta. Informěrował wót togo jo głownoamtski wjednik projekta Maks Hasacki. Wón jo pódšmarnuł, kak wažna žywa diskusija za ten projekt jo. Pótom jo rozpšawił wó źěłaŕni z profesorom Greymorningom k nowej metoźe, kótaryž „Zorja“ wužywa za nawuknjenje rěcow. W Janšojcach se wótmějo rowno kurs za wužywanje teje metody. Dajo ale hyšći wótworjone pšašanje k zapłaśenim wobźělnikow. Te se zawězuju za jadno lěto pśi Zorjach wuknuś, a to 30 góźinow wob tyźeń, pódobne źěłowego městna. Pšawniski pósudk dej rozjasniś wó modusu. Dej to stipendium byś, kenž jo wulichowane wót zasłužbowego danka? Kótare dalšne móžnosći su – snaź normalny stipendium (z wótedaśim zasłužbowego danka), abo pśistajenje „Zorjakow“ pla DomPro GmbH? Jo něco pódobnego ako zwězkowa dobrowólna słužba (Bundesfreiwilligendienst) ideja? Zwězane z tym dypkom stej licba wobźělnikow a docentow, a teke wusokosć płaśiznow.