Z Mósta/Heinersbrück. Mósćańska młoźina jo swěśiła slědnu sobotu, dnja 13. awgusta, tradicionalny žnjowny swěźeń na sportnišću. Swěźeński źeń jo se zachopił zeger dweju, ako młoźina jo śěgnuła z dujaŕskeju kapału „nAund“ a ze žnjownym wózom pśez wjas. Pón su pěś rejtarje z kónjami pśez wrota rejtowali a małe prezenty se „wułojli“ a pózdźej zawěsće jo był kokot na rěźe.
Prědny kral jo Lorenz Paulick na kónju „Chep“ a Josi Dresselojc jogo kralowka. Lenny Hobracht jo drugi kral z „Lucky“, dokulaž wón jo mógał prědne kśidło wótryś, a jo se wupytał Lea Raschojc ako swóju kralowku. Jeremy Krüger na „Uschi“ jo měł tśeśe městno a jo dostał Jaqueline Reinogojc ako kralowku. Ten młodšy rejtaŕ Simon Reinoga na „Polski“ jo bóžko padnuł a jo sebje klucycu złamał, weto jo był wjacor na reji.