Z Małego Kólska/Klein Kölzig. Tema klimoweje změny drje wěcej luźi pógibujo nježlic až to smy sebje to myslili. Nejmjenjej jo to dopokazał wjeliki zajm pśiglědarjow pśi wótwórjenju noweje wósebneje wustajeńce „Klimowu změnu rozměś – wobgrozenje źinsajšnych ekonomiskich změnow w glědałce stawiznow zemje“. Zawjeźeński pśednosk jo tam źaržał dr. Manfred Kupetz, pśedsedaŕ spěchowańskego towaristwa „Geopark Muskauer Faltenbogen e.V.“. Klimowa změna se póśěgujo na zasadne dłujkolětne změny globalneje klimy. To jo system, kótaryž zwisujo gromadu ze słyńcom, zemju a oceanom, wětšom, dešćom a sněgom, gólu, pusćinu a sawanu. „Źinsajšny źeń pśidu k tomu cłowjeske aktiwity“, tak dr. Kunetz. Klimowa změna se dokumentěrujo na grichiskej kupje Lesbos. Tam jo se wuwjadł pó wulkanizmje pśed 19 mio lětami. Lesbos se fokusěrujo na klimowu krizu a priorizěrujo swóje aktiwity, aby luźe źinsajšnego casa wustatkowanja klimoweje změny rozměli. Tamna kamjenjata góla jo jaden z nejrědnjejšych a nejwuznamnjejšych geologiskich pśirodnych pomnikow cełego swěta.