Z Dešna/Dissen. Pśedslědny kóńc tyźenja su w Dešnje źěłali na rolach ako w casu DDR. „W casu LPG su te luźe we žnjach wěcej gromadu źěłali ako źinsa a to teke musali“ groni Mario Hasacki, kenž jo lětosa małe zmakanje DDRskich žnjownych mašinow w Dešnje organizěrował, „ta zgromadnosć jo źinsa zasej raz cuś. W Dešnje se bury mjazsobu hyšći pomagaju, w młogich drugich jsach źěła jaden pśeśiwo drugemu abo se waźe wó rolu.“ Jogo nan Oskar Hasacki jo był pśedsedaŕ prodrustwa „Clara Zetkin“ w Brjazynje a by se togo nostalgiskego wobraza wjaselił: styri secomłośenice typowu „Fortschritt E514“ a „E512“ su womłośili jacmjenjowe pólo na „wjelem“ (stronine mě wjelikich pólow napšawo drogi do Žylowa). Wšake stare mašiny su pśi tom pódpěrali: „Belarus MTS 52“ z chołujom a „Fortschritt ZT 300“ z walikoweju prasu „Fortschritt K454“. Samo stare wózydło wognjoweje wobory a „Fortschritt ZT 323“ z wódowym wózykom stej pódla byłej. Teke źinsa jo to suchoty dla kradu dobra ideja: „Pjerwjej jo se ze secomłośenicu kužda rola nejpjerwjej jadnu rundu wobmłośiła, pón su wórali.