Z Města/Cottbus. „Telik njamógu jěsć, ako cu bluwaś. Tak wjele škódy za ten dobry sćelak“ – taku a druge reakcije som dostała wót pśijaśelki, ako jo wóna zgóniła wó pócynjanjach rbb-intendantki Patricije Schlesinger. Wóna njejo była jadnučka – mam wjeliku familiju, wjele pśijaśelkow a pśijaśelow, znatych, susedkow a susedow. Wšykne wěźe, až źěłam ako redaktorka pla rozgłosa Barliń-Bramborska (rbb), až som nawjedujuca redaktorka serbskego programa.Wěcej ako jaden raz su wše te luźe wěcej wó zapletkach intendantki wěźeli ako my pśistajone. Smy w chóśebuskem studiju tak mało luźi, personal jo se w slědnych lětach kšac pó kšacu widobnje reducěrował, až maju te, ak how źěłaju, dosć z programami a wusćełanjami cyniś a njamógu stawnje na handyjowe powěsći glědaś abo do interneta. Źěłamy – daloko pšec wót „centrale w Barlinju“ - za dobry program a procujomy se kuždy źeń wó nowosći a dobry zwisk k našym pśisłuchaŕkam a pśisłucharjam. To jo našo źěło, za to smy pśistajone abo mamy druge dogrono, a dostanjomy naše myta abo honorar.