Z Janšojca/Jänschwalde. Prědny rěcny kurs projekta „Zorja“ jo se tudy pśewjadł stwórtk tyźeń. Wjednica janšojskego muzeja Nadine Adamowa jo pśi tej góźbje kursistam źurja swójeje institucije wótcyniła: „Mamy w muzeju śpu za zjawne tšojenja a comy, aby luźe ju wěcej wužywali. Muzej ga jo tejerownosći město zmakanjow“. Maksimilian Hasacki buźo we pśiducyma mjasecoma ten kurs wjasć. Za njogo jo to premjera, źož změjo góźbu tu wuwołanu ASLA-metodu wuproběrowaś – ASLA, to groni: Accelerated Second Language Acquisition (póspěšone pśiswójenje drugeje rěcy). Z teju sameju jo wón se wopóznał na workshopje w měrcu, źož antropologa Neyooxet Greymorning z USA jo ju pśedstajił – to jo ten wunamakaŕ teje metody. Wóna se pódpěra na źiśece wuknjenje rěcy. Pśi tom njejźo wó gramatiske tabele, ale skerjej wó powědanje a słyšanje. Pśistup k rěcy dej se z pomocu teje metody malsnjej dostaś. „Rěc wuknuś jo kaž dom twariś, nejpjerwjej musy se twardy fundament połožyś“, groni Maksimilian. Wobźělniki kursa wuknu z pomocu bildow, pó rědu, nejpjerwjej substantiwy, pótom werby a prepozicije.