Gdyž su se w casu DDR zmakali wušywaŕki z Dolneje Łužyce w Serbskem muzeju, w Serbskem domje a hynźi, jo mjazy nimi pśecej sejźeł jaden muski, a teke wón jo pokazał drugim swóje nejnowše wušywanki. Wón jo pśijěł z Kósobuza/Kunersdorf, a jomu jo se groniło Joachim Lindner. Jo był tegdy ten jadnučki znaty a pśipóznaty muski, ako jo wušywał za serbsku drastwu, a to we wusokej kwaliśe a kšasnej rědnosći. Ten cas pak jo něnto bóžko mimo – Joachim Lindner jo pśed krotkim - 20. junija – wumrěł, 91 lět stary. Na kjarchobje we swójej domacnej jsy jo namakał swój slědny wótpócynk.