Z Budyšyna/Bautzen. Wobdata wót wuknikow a wuknicow, pśichodnych kubłarjow a kubłaŕkow, wóna pśichwata wót wuknikojskego koncerta w Nimsko-Serbskem ludowem źiwadle do Pówołańskošulskego centruma Budyšyn. 63lětna ceptaŕka za muziku Leńka Thomasowa powěda ducy ze swójimi młodostnymi wó rowno dožywjonych muzikowych twóŕbach wšakich žanrow. Ceptaŕka na Serbskej fachowej šuli za socialnu pedagogiku, integrowana do šulskego centruma, swój entuziazm za muziku tym wuknjecym dalej dawa, jich za rědnosć melodijow sensibilizěrujo. Togodla se wšak pśecej rada take wuknikojske koncerty z wuknjecymi woglěda. „Muzika wochłoźijo dušu cłowjeka. Pśichodne kubłaŕki a kubłarje ju trjebaju, aby mógali pó wuspěšnem wukubłanju swójim wótkubłańcam dalej daś nutśikownu radosć a wjasele za muziku. Muzika jo mě tež wót źiśecych lět sem zagrěła. Ako šulske góle som se groniła, až cu ceptaŕka za muziku byś.“