Z Rogozna/Willmersdorf. Njeźelu su se nagromadu styri mustwa na balokopaŕskem turněrje „Domowina-Cup“ wobźělili. To su byli młodostne z Depska, z Hochoze, ze Žylowa, kenž su byli wuwitane wót gósćinarja, to jo była rogozańska młoźina. Pśecej sedym grajarjow jadnogo mustwa jo grało pśeśiwo drugemu na małem pólu, a tak su grali tam pśecej dwě runźe pó dwanasćich minutach.

Młoźina z Rogozna jo se gromadu z Domowinu starała za jězu a piśa. Rogozański młoźinski šef, Paul Hempel, jo Casnikoju wulicował: „Smy zachopili tak někak pśed tśimi tyźenjami treněrowaś a smy byli zwětšego wósym do źaseś koparjow.“ Fany mustwow su „swójich“ grajarjow pógónili, ako pśi graśu mjazy Žylowarjami a Rogoznarjami we drugej runźe. Wósebnje hochoske pśiwisniki su Žylowarjam palce tłocyli, dokulaž su ze zejgraśim Rogozna z tym licyli, až swójske cup dobydnu. Jadna wót małych pśiglědaŕkow jo była Diana Schillerojc z Rogozna, wóna jo se wobtužyła dla wobźělenja. „Jo škóda, až tak mało jsow ma zajm za balokopaŕski cup až se tak mało wót młoźiny wobźělijo.“