Europeada 2022 jo se wótměła w Korutańskej/Kärnten w Awstriskej. Gósćowarje za 19 muskecych mustwo a 4 žeńskece mustwa z 12 europskich krajow su byli Słowjeńce, to groni pśisłušniki słowjeńskeje ludoweje kupki, ako su tam blisko granice k Słowjeńskej žywe. Koroška – to jo to słowjeńske mě za Korutańsku, a tak su se dali tamne słowjeńske wobydlarje to mě „Koroški Slovenci“ abo „Slovenska manjšina na avstrijskem Koroškem“. Kak su žywe, kake pšawa a móžnosći maju a kak wóni woplěwaju swóju identitu, swóju maminu rěc a swóju kulturu?