Z Jarješka/Jerischke. Wót njeźele do zachadnego pětka jo chóśebuski Rěcny Centrum WITAJ (RCW) zasej raz wugótował WITAJ-camp w tudejšem nakrajnem šulskem domje wjažy na jsy (Landschulheim). Ten južo tradicionelny projekt měri se na źiśi a młodostnych, aby jim póbitowali wósebny rum za wužywanje serbskeje rěcy. Jadnab 30 źiśi, w starstwje wót wósym do 17 lět, jo se lětosa na tom wobźěliło.
Njeźelu su wóni pśijěli a se wopóznawali z wobstararjami. Pódla organizatora Aleksandera Draguły, ako jo rěcny pedagog w chóśebuskem RCW, su to byli absolwentka Dolnoserbskego gymnaziuma, Isabelle Grätzojc, nowy lektor RCW, Maks Bagańc, a zagronita Domowiny za serbske młoźinske źěło, Franciska Albertowa. Jich a źiśi jo lětosa zasej pśiwitał Dietmar Thron, wjednik šulskeje wjažy na jsy.
Pónjeźele jo wón pśedstajił historiju Mužakojskego wokłona w informaciskem centrumje jsy. Wušej togo, tak ako w pjerwjejšnych lětach, stej wón a jogo žeńska wobźělnikam WITAJ-campa stawnje k pomocy byłej.