Z Bórkow/ aus Burg. Pětk wjacor, 24. junija, pśi śmojtem swětle jo se dogromady 11 wósobow w błośańskej bibliotece „Mina Witkojc“ schadowało a su na cytanje z Rolfom a dr. Edeltraud Radochlojc cakali. Cytanje z awtor*koma a nakładni*coma jo jano jadno zarědowanje w rěźe biblioteki „cytanje za dorosćonych“. Wót apryla lětosa su how kuždy mjasec cytanja a zarědowanja k wšakim temam, raz politiske, raz luštne abo raz regionalne.
Na tom wjacorje su mytiske bytosći tema cytanja byli. Toś ta tema jo pśedewšym turist*ki pśiwabiła, kaž jo organizatorka, Gaby Eichhorst, ned pó cytanju wulicyła. To jo pópšawem škóda, dokulaž jo rěd zarědowanjow pśedewšym za domorodnych planowany. Z tym deje zarědowanja k zdźaržanjeju biblioteki pśipomagaś. Eichhorst ale wě, až njejsu mytiske bytosći nowa tema za domorodnych a njepógnuwaju luźe. Z domorodnymi ale licy Eichhorst na pśiducych zarědowanjach, nejpózdźej na zarědowanju w nowemberje, gaž Peter Becker buźo wulicowaś wó nałogach w běgu lěta.