Z Budyšyna/Bautzen. Slědnu wałtoru jo Rada Załožby za serbski lud gromadu stupiła a dalej wjadła to zejźenje wót 24. maja. Tam su powědali wót stawa koncepcije „Serbskego foruma wědy“ pśi budyšyńskem Lawskem arealu. W septemberje dej se wustajiś architektowe wuběźowanje, jo pisała ta rada w medijowej powěsći. Dalej jo wóna pśigłosowała, aby se zbytne, njewužywane srědki budgetowego lěta 2021 wužywali za notne napšawy, ako na pśikład wótpóranje štormowych škódow na Serbskem instituśe w Budyšynje. W budgetowem lěśe 2021 jo wjele pjenjez, wěcej ako miliona euro, „wušej wóstało“, zwětšego dla krotkego źěła pla Serbskego ludowego ansambla (SLA). Pśicyny su byli napšawy dla pandemije. Wóne srědki budu spórane do zawodowych žarjabkow (Betriebsmittelrücklage). Powědała jo ta rada teke wót tarifoweje situacije w Ludowem nakładnistwje Domowina (LND). Jadnaŕ togo LND Syman Pětr Cyž jo póžedał pla zastojnstwa załožby, až budu płaśizny pśistajonych w LND pśiměrjone tym tarifam, kótarež druge serbske institucije płaśe swójim sobuźěłaśerjam.