Z Depska/Döbbrick. 3 lěta jo musała Depšćańska młoźina cakaś, nježlic až jo mógła byś gósćowaŕka volleyballowego turněra Domowiny. W lěśe 2018 jo wóna Domowinski turněr dobyła a jo směła ten pśiducy pśi sebje doma pśigótowaś. Nagromadu jo se 6 mustwow na pśepšosenje domowinskego młoźinskego koordinatora Tobiasa Ungera za njeźelu 3. julija pśipowěźeło. Pód nowym wjednistwom jo pśišło teke k wšakim změnam. Tak jo se turněr nic ako doněnta na sobośe pśewjadł, ale njeźelu. Mimo togo njejsu trjebali wobźělniki nic za to płaśiś, ale njejsu teke dostali wódu k piśeju a wobjed. Jadna gluka, až jo był na tom kóńcu tyźenja teke sportowy swěźeń w Depsku, tak až jo tam take wšake sajźiło.