Z Dešna/Dissen. Na prědnem julijowem kóńcu tyźenja jo se Dešański domowniski muzeum pśeměnił ze swójim cełym arealom za cerkwju a za „starym ludom“ do bajkojteje krajiny. W muzeumje su mjeńše a wětše woglědarje pód nawjedowanim pupkoweje wuměłcowki Regina Herrmann byslili bajkojte figury. Slězy cerkwje jo było wšym kazane na pśewoblekanje. Źiśi ako princ abo princesna su se pśeměnili na klinje mamow a nanow do bajkojtych fotowych motiwow, pśiwzetych wót ramika bajkojtego glědałka. Do togo su se dali źowća a gólcy hyšći wót Katrin Šwjelineje z domowniskego muzeuma a jeje pomócnice Bärnitza Vogtoweje woblico šminkowaś. Ale docełego njejo tych 300 woglědarjow na tyma dnjoma měło wjele casa se pśewoklekaś, basliś a šminkowaś, dokulaž te wulicowarje tych bajkow su jich magiski pśiśěgnuli. Silvia Ladewig a Oliver Kube, źiwadłownika wulicowańskego źiwadła „Machandel“, wobej z Barlinja, stej tšojeńko wót tšašnego gósća w młynje młynikaŕki Lubina wožywiłej.