Ze Kśišowa/Krieschow. Nicht njejo taki mały, až njeby mógał wó sebje samego pśerosć! Wósebne zakóńcenje šulskego lěta su wugótowali ceptaŕki zakładneje šule w Kśišowje pód nawjedowanim kněni Golzbuderoweje swójim wuknicam a wuknikam. Město wucby su wót 27. junija až do 1. julija gótowali projektowy tyźeń. Projektowy cirkus „Klecks“ jo póbył w Kśišowje. Ale źiśi njejsu chójźili do cirkusa, aby tam pśiglědowali. Wóni su dejali sami byś te „stars“ we tej manežy. W běgu mało dnjow su źowća a gólcy nawuknuli tak wótere kumšty, z kótarymiž su pśiglědarjow rozpalili. Kužde góle jo se wuproběrowało. Tych móžnosćow jo było wjele. Wšojadno lěc wuše rědownje abo niše, wše su gromaźe źěłali a se mjazsobu pódpěrowali. A tak njejsu źiśi nazwucowali jano kumštne kuski, ale su wuknuli teke gromadu źěłaś. Su se dejali jaden na drugeg móc spušćiś, jano dokulaž su derje gromadu zdźaržali a sebje pódpěrowali, su mógli prezentěrowaś dwa wjelicnej wustupje. Jo dało klownow, kótarež su publikum rozwjaselili. A teke guslowarje su wjadli luźi do swěta cowanjow.