Z Chóśebuza/Cottbus. Wuknice a wukniki konserwatoriuma (muzikowa šula) su slědny stwórtk na dwórje Serbskego muzeja gercowali. Koncert jo wokoło dwě góźinje trał. Pśez program jo małki zešywk wjadł, ale teke moderatorka wót konserwatoriuma jo se za to póstarała. Na zachopjeńku jo Martina Nowakojc (kuratorka Serbskego muzeja) wšykne gósći wuwitała. Pśi tom jo mjazy drugim groniła, až ten koncert ma juž dłujku tradiciju. Pśeto pśed wobnowjenim muzeja a pandemiju su w lěśe 2015 samo 20. koncert na dwórje zarědowali, něga hyšći pód lipu. Serbsku lipu wěcej njamaju, ale wjelike lipowe łopjeno jo se ako symbol do spódka wuflastrowało. Ako pśemósćenje su se w Serbskem domje tež koncerty wótměli.