Z Wjeskeje/Łęknica. Źož źinsa jo nimsko-pólski „Geopark Mus-kauer Faltenbogen“, su něga namakali wugel, glinu a głažkowy pěsk. Jamy how su słušali ku tym prědnym w Nimskej, casy jo jich 60 było. W 19. lětstotku su se how wšake industrije zasedlili, źož su głažkowy pěsk rozškrěli, z glinu su cygle źěłali a z rudnikow su dobyli bryłu (Raseneisen). Na industrielnu zachadnosć tych stronow wjele dopomnjejo. Ku tym znankam stareg casa słušaju tek „jězory“, nimski „Gieser“. To su za łužyske brunicowe krajiny typiske dłymocyny a mokše cony, słowo pśiźo wót górnoserbskego słowa jězor (jazoro). Źinsa jo krajina rewěr za turistow, teke něgajšna jama „Babina“ (to mě jo wzete ze serbskeje rěcy). Wóna jo zawóstajiła wšake jězory, wóni wuglědaju ako rědne jazora. Wóda pak jo kisała, a žedne ryby how njejsu žywe. Skobodne pódnurjarje su se weto wudali na turu pód wódu we tej starej jamje, mjazy nimi Pjeńkoc Michael. Wón jo aktiwny w pódnurjaŕskem klubje „Aqua-Team“ w Běłej Wóźe. Wšake stej wón a jogo towariš namakałej, zawóstanki jamy, a zawóstanki drugich pódnurjarjow. Pór impresijow teje tury jo how wiźeś.