Ze Slěpego/Schleife. Ako jo sćelak MDR rozpšawił, su 27. junija w Serbskem kulturnem centrumje w Slěpem pśedstajili wuslědki „wódowego monitoringa“. Za to pśepytowanje jo dała firma Leag nadawk. Pśi tom źo mjazy drugim wó to, měriś staw gruntoweje wódy. W połnocnem źělu Běłeje Wódy jo staw gruntoweje wódy spadnuł. Bilanca: Pó datach inženjerskego běrowa, kótaryž jo wóny nadawk měł, jo dało pśi tom w casu wót nalěśa 2018 až do srjejź lěta 2021 negatiwnu wódowu bilancu. Jo se mjenjej napadało nježlic až jo se wóda wupariła. A teke raz mócny dešć njejo mógał pegel wódy w Slěpem, Trjebinje a źěwinje bejnje pówušyś. „Staw gruntoweje wódy jo pokazał póniženje wjedra dla. Akle wót srjejź lěta 2021 jo se pokazało wulichowanje w někotarych wótrězkach.To pśez to wóduwótpušćenje južo trjebne póniženje jo z teju suchotu hyšći pśiběrało. Tobias Radach, projektowy wjednik wódowego monitoringa pśi inženjerskem běrowje G.U.B.Freiberg, jo był slědne pónjeźele w Slěpem. To wšo jo wjadło až do awgusta lěta 2021 k nejmócnjejšej suchośe w slědnych 100 lětach.