Z Kóšnojc/Koschendorf. Nawjedowane wót Domowniskego towaristwa, su Kóšnojcarje stajali jich majski bom najsy, na tudejšem naměstnje Alfreda Janigka. Wšake gósći z wokolnych jsow su jim, ako južo w casu pśed koronu, pilnje z tym pomagali. Tak ako jo nałog, su muske za to jano wužywali jabeŕ a drjewjane žerźi. Z brjazu 17 mejtari wusoki majski bom su wejsanarje pó dwělětnej pawzy zasej z priwatnego składa holili. Pór lět staru chójcu su pak nadrobnje kontrolěrowali, nježli su sobotu pśigótowali girlandu a wěnka za nju. Wupyšnili su bom sobotu wjacor z gałuzkami škrjokow na Scholcojc dwórje. Girlanda jo 25 mejtari dłujka a na wjelikem wěnku su wisali banśiki w serbskich barwach. Nimsku a serbsku chórgoj su pśicynili na štom boma. Wósebnosć jo lětosa zasej mjeńšy „źiśecy wěnk“ był. Ten jo, wót lěta 2019, nowa tradicija w Kóšnojcach, wulicujo Roswitha Altekrügerowa, pśedsedaŕka Domowniskego towaristwa. „Z tym comy źiśi a młodostnych wěcej zapśěgnuś do tradicijow našeje jsy. Smy ga jano mała wjas z jadnab sto wobydlarjami.