Z Města/Cottbus. Chtož woglědajo něnto do Serbskego muzeja na Młyńskej droze w měsće, ten buźo se wěsće źiwaś, kak rědnje a derje su zestajili tam tu nowu stawnu wustajeńcu. Kradu nowe a teke moderne su tam wšykne wugótowali. To su teke gronili a chwalili cłonki chóśebuskeje Domowinskeje kupki, ako jo jich Christina Kliemowa gano wjadła pśez ceły muzej. Něco pak jo jim do wócowu biło, a to, až su wiźeś we tej nowej wustajeńcy jano někotare wobraze, mólby a dalšne eksponaty serbskego twórjecego wuměłstwa (bildende Kunst). Bóžko jo za take pśemało ruma. Rowno naše mólaŕki a mólarje su pśedstajili a dalej pśedstajiju ze swójimi twóŕbami, kak bogata a rědna jo naša serbska kultura. A to by dejało byś pśecej a we wětšej licbje k wiźenjeju – wěsće njejsu nic jano w Serbskem muzeju měnjece.