Z Drježdźan/Dresden. „Kak klincy domownja? - Sinfonija kulturow“ jo titel awdiowizuelnego projekta, z kótarymž co wuměłc Felix Räuber cełu Saksku akustiski zwobrazniś. Sedymego junija jo se wótměła prědna pokazka we wjelgin derje woglědanym Drježdźańskem kulturnem palasće. Pódla Räubera jo stojało docełego 42 dalšnych akterow na jawišću, mjazy drugimi Žytawske duo Forest Roots, lipšćański komorny kwartet Mondéna tak ako teke chor alpinistow, kótaremuž se groni „Die Bergfinken“. Spiwaŕka Lidija Walenta a Basel Alaktrib na instrumenśe oud stej pśidałej ruske a w drugem paźe syriske zuki.
Zazněli su na kuždy pad tradicionalne lokalne melodije a jich moderne wobźěłanja. Dalej jo zaklincał prědny razo Gerhard Gundermanowy „Lied der Raumschiffe“. Mimo togo jo pokazał Räuber na Serbow, kótarež „ako indigeny lud wó wjele dlej su žywe we Łužycy ako Nimce.“ Jo, a Serby su teke stojali na jawišću.
Jurij Hantuš, Matej Dźisławk a Daniel Wjesela su zagrali „Serbsku sinfoniju“, w kótarejž su wuměłski spletowali ludowe motiwy a spiwanja jatšownych rejtarjow.