Z Rogowa/Horno. Teke w casu pandemije smy w Domowinskej župje Dolna Łužyca w slědnyma lětoma wjele dobrego a nowego naźěłali. To jo se zwěsćiło na 30. głownej zgromaźinje nejwětšeje Domowinskeje župy, ako jo se wótměła slědny tyźeń pětk w Rogowje. Pśed pśisamem 60 delegatami a gósćimi – mjazy nimi Dawid Statnik a Hartmut Leipner, pśedsedaŕ Spěchowańskego towaristwa za serbsku rěc w cerkwi a drugi pśedsedaŕ Domowiny – jo župan Pětš Šurman we swójej rozpšawje wustajił, až njejo było źěło župy a jeje pśedsedaŕstwa rowno lažke w slědnych mjasecach. Teke kupki a towaristwa njejsu mógali to dojśpiś a wšo to do statka stajiś, což běchu se prědk wzeli. Wšake pak jo se stało, cesto „w śichem“, což jo nowe a wažne za cełe dalšne źěło w župje. Mjazy drugim jo se załožyła „Kulturna akademija“, kótaraž na wšakich pólach serbske kulturne źěło w Dolnej Łužycy lěpjej spěchujo a pódpěrujo. Prědne dobre rezultaty togo su južo wiźeś. Ako dobru wěc jo župan teke nalicył, až jo župne pśedsedaŕstwo wobradowało ze zastupnikami šulskego amta wó tom, kak móžo se serbska wucba w šulach pólěpšyś a rozšyriś.