Z Lěścow/Hornow. Gaž w Chóśebuzu jo mark, wałtoru pśi Nimskej cerkwi a srjodu pśed Měsćańskeju halu, ga cakaju zajtšo rano kupce južo na pśedawańske awto z Lěšćow wót „Małego dwóra“. To dobre póbitowanje se teke spódoba kupcam w Běłej Wóźe a w Grodku. Wót źo te dobre lěšćańske produkty pśidu, to móžo se kuždy woglědaś tu njeźelu. Rozmjej: Na Dörryjojc „Kleiner Hof“ změju zasej swěźeń, dokulaž wobstoj mjaztym južo 20 lět. Howacej kužde lěto swěśe, we slědnyma lětoma pak jo dla korony była pawza.
W slědnyma lětźasetkoma jo se ten „Mały dwór“ derje wuwijał, glědajuce na góspodaŕski bok. To jo priwatne rolnikaŕstwo, kenž ma dwórowu lodu na Grodkojskej šoseji. Ta loda jo woblubowana pla stawnych kupcow, a we ferijach teke pla turistow a kólasowarjow.