Pśed połtera lětom jo górnikojska firma Leag znate cyniła, až njemusy se Prožym wugloweje jamy Wjelcej-pódpołdnjo wótpóraś. Co jo se mjaztym stało? Za Nowy Casnik jo se z Wjelcańskeju šołtowku Birgit Zucholdoweju (SPD) rozgranjał Jost Schmidtchen. Prožym jo wejsny źěl Wjelceja.
Kněni Zucholdowa, kak wuglěda tuchylu w Prožymje?
Birgit Zucholdowa: Tšach pśed górnistwom słuša do stawiznow jsy. To na tom wiźimy, až co wjele luźi sebje how kupiś grunty a až stoje młoge bydleńske domy hyšći prozne. Krajinowy region we a kołowokoło Prožyma jo zasej atraktiwny. Zwězany jo wóny zajm ze žycenim sebje how twariś bydleński dom abo stare domy saněrowaś.
Za wětšy źěl kśě luźe, kótarež we jsach bydle, aby infrastruktura w pórědku była. Co móžo Wjelcej a jogo wokolina jim póstajiś?