Z Budyšyna/Bautzen. Zwězk serbskich wuměłcow jo na swójej głownej a wólbnej zgromaźinje slědnu srjodu jadnogłosnje Jana Bělka ako pśedsedarja towaristwa wobtwarźił. Teke mimo napśeśiwnych głosow z jadnym zdźaržanim głosa su wuzwólili pśibytne zgromaźiny – jich jo było něźi 20 – Jěwu Marju Čornakec, Jana Cyža, Michała Cyža a Bosćana Nawku zasej do nowego pśedsedaŕstwa, kótaremuž teke pśisłuša Měrka Mětowa.

Pó rozpšawje stoj zwězk na solidnej financielnej bazy. Njeglědajucy na śěžke wobstojnosći pandemije dla su se mógali młoge zarědowanja a projekty realizěrowaś. Wósebnje wuzwignuł jo Bělk mediateku „serbskiTV“, kótaraž stoj k dispoziciji na YouTube a instagram, a ma mjaztym wušej 60 nagrawanjow a krotkich cytanjow wšakorakich žanrow w gorno- a dolnoserbskej rěcy.